အောင်မြင်လိုသူတိုင်းအတွက် စိတ်ဖိစီးမှုတွေကို မောင်းထုတ်ပစ်နိုင်မယ့် နည်းလမ်း ၈ သွယ်

လုပ်ငန်းခွင်မှာ တစ်ချိန်ချိန်မှာတော့ စိတ်ညစ်ညူးစရာတွေကို တစ်နည်းမဟုတ်တစ်နည်းနဲ့ ကြုံတွေ့ရမယ်ဆိုတာ မြေကြီးလက်ခတ်မလွဲပါပဲ။ လူတွေဟာ စိတ်ဖိတ်စီးမှုတွေကို အကြောင်းမယ်မယ်ရာရာမရှိဘဲ မျိုသိပ်ထားလေ့မရှိကြပါဘူး။ ရင်းနှီးတဲ့ မိတ်ဆွေတစ်ယောက်ယောက်ကို ရင်ဖွင့်တိုင်ပင်လေ့ရှိတယ်ဆိုတာကို တွေ့ရပါတယ်။ လုပ်ငန်းတစ်ခုကို ဦးစီးဦးဆောင်လုပ်နေလို့ စိတ်ဖိစီးမှုတွေကို ခံနိုင်ရည်ရှိနေပြီလို့တော့ မဆိုလိုပါဘူး။ စီးပွားရေးလုပ်ငန်းတွေမှာ အောင်မြင်လိုသူတွေအတွက် စိတ်လှုပ်ရှားမှုတွေ၊ ဖိစီးမှုတွေကိုထိန်းချုပ်နိုင်စေမယ့်နည်းလမ်းအချို့ကို ဖော်ပြပေးလိုက်ပါတယ်။

လုပ်ငန်းရှင်တွေဟာ သူတို့ရဲ့ ဝန်ထမ်းတွေထက် စိတ်ဖိစီးမှုပိုများတယ်လို့ Gallup-Healthways Well-Being Index ဆိုတဲ့ ကမ္ဘာလုံးဆိုင်ရာ ကျန်းမာရေးအညွှန်းကိန်းရဲ့ နောက်ဆုံးလေ့လာတွေ့ရှိချက်တစ်ခုမှာ ဖော် ပြထားတယ်။ ၃၄ ရာခိုင်နှုန်းသော စွန့်ဦးတီထွင်လုပ်ငန်းရှင်တွေဟာလည်း သူတို့ရဲ့ဝန်ထမ်းတွေထက် ၄ ရာခိုင်နှုန်းပိုပြီး စိတ်ဖိစီးမှုများတယ်လို့ဆိုတယ်။ Gallup ရဲ့ သုတေသနမှတ်တမ်းတွေအရ ၄၅ ရာခိုင်နှုန်းသော လုပ်ငန်းရှင်တွေနဲ့ ၄၂ ရာခိုင်နှုန်းသော ဝန်ထမ်းတွေကို နှိုင်းယှဉ်ကြည့်တဲ့အခါမှာ လုပ်ငန်းရှင်တွေကပိုပြီး စိတ်ဖိစီးမှုများတယ်လို့ ဖော်ပြထားတယ်။

စိတ်ဖိစီးမှုဆိုတာ လုပ်ငန်းခွင်မှာရှောင်လွှဲလို့မရနိုင်တဲ့ အစိတ်အပိုင်းတစ်ခုဖြစ်တာကြောင့် အဲဒီကနေပြီး ရုပ်ပိုင်းဆိုင်ရာ၊ စိတ်ပိုင်းဆိုင်ရာထိခိုက်မှုတွေကို မလိုချင်သူတိုင်းဟာ ဒါတွေကိုဘယ်လိုဖြေရှင်းရမယ်ဆိုတာကို နားလည်ထားဖို့လိုတယ်။ တချို့သော လုပ်ငန်းရှင်တွေဟာ သူတို့ရဲ့စိတ်ဖိစီးမှုတွေ၊ စိတ်လှုပ်ရှားမှုတွေကို ထိန်းချုပ်ထားနိုင်ပါတယ်။ စိတ်လှုပ်ရှားမှုတွေ၊ ဖိစီးမှုတွေကို ထိန်းချုပ်ထားနိုင်တဲ့ လူဆယ်ယောက်ကို ကြည့်မယ်ဆိုရင် ကိုးယောက်က စီးပွားရေးမှာ အောင်မြင်နေတဲ့လုပ်ငန်းရှင်တွေ ဖြစ်တယ်လို့ Talent- Smart ရဲ့ သုတေသနပြုလုပ်ချက်တွေအရ သိရပါတယ်။

၁။ အခြေအနေကို သုံးသပ်ပါ။

စိတ်ဖိစီးမှုဖြစ်စေတဲ့ အကြောင်းအရင်းဇာစ်မြစ်ကိုဆန်းစစ်ပါ။ စိတ်ညစ်ရခြင်းရဲ့ အဓိကအကြောင်းအရင်းကိုသိရင် ဖြေရှင်းဖို့နည်းလမ်းကို ရှာလို့ရမှာပါ။ လုပ်ငန်းရှင်တွေဟာ အချိန်၊ ငွေကြေးနဲ့ဆက်ဆံရေးဆိုတဲ့ သုံးခုကို အထူးဂရုစိုက်ရပါမယ်။ ကိုယ့်ရဲ့စိတ်ဖိစီးမှုတွေကို လျော့ချပေးနိုင်မယ့် နည်းလမ်းတွေထဲကဘယ်နည်းလမ်းဟာ ကိုယ်နဲ့အသင့်တော်ဆုံးလဲဆိုတာကို အချိန်ယူပြီးစဉ်းစားပါ။ကယ်လီဖိုးနီးယားတက္ကသိုလ်ရဲ့ သုတေ သနပညာရှင် Robert Emmons က ကျေးဇူးတင်စကားပြောတာဟာ စိတ်ဖိစီးမှုတွေကို လျော့နည်းစေတဲ့အပြင် ပေါင်းသင်းဆက်ဆံရေးနဲ့ ကျန်းမာရေးကိုလည်း ပိုမိုကောင်းမွန်စေတယ်လို့ ဆိုတယ်။

၂။ ရှုပ်ရှုပ်ယှက်ယှက်တွေ မလုပ်ပါနဲ့။

ဒီထက်ပိုလွယ်ပြီး အချိန်ကုန်၊ လူပင်ပန်းသက်သာစေတဲ့နည်း မရှိတော့ဘူးလားလို့ အမြဲမေးပါ။ တခြား လူတွေ ဘယ်လိုလုပ်နေတယ်၊ သူတို့ဆီက ဘာတွေသင်ယူနိုင်မလဲဆိုတာကို အမြဲမပြတ်လေ့လာပါ။ သင့်ရဲ့လေ့လာဆန်းစစ်မှုတွေက ဒီထက်ပိုကောင်းပြီး အဆင်ပြေစေမယ့်နည်းကို တွေ့စေမှာပါ။

၃။ အရေးကြီးတာတွေကို ဦးစားပေးလုပ်ပါ။

တစ်ရက်မှာ ၂၄ နာရီပဲရှိတဲ့အတွက် ကိုယ်လုပ်ချင်တာတွေ အားလုံးကို တစ်ပြိုင်နက်တည်း မလုပ်နိုင်ဘူးဆိုတာကို နားလည်သဘောပေါက်ထားပါ။ ဘယ်အရာမဆို အရေးကြီးတာတော့ မဟုတ်ပါဘူး။ ဒါကြောင့် အရေးအကြီးဆုံးဆိုတဲ့ ကိစ္စတွေကို ဦးစားပေးလုပ်ပါ။ တခြားလူတွေ သူတို့အဆင်ပြေဖို့ အကူအညီလာတောင်းတဲ့ကိစ္စတွေနဲ့ အလုပ်ပိုတွေကိုတတ်နိုင်သမျ လျော့ချလိုက်တာက သင့်ရဲ့အလုပ်တွေကို ပိုပြီးအောင် အောင်မြင်မြင်နဲ့ အဆုံးသတ်နိုင်စေမှာပါ။

၄။ အရည်အချင်းပြည့်ဝတဲ့ဝန်ထမ်းအဖွဲ့ကို ခန့်ထားပါ။

ယနေ့ခေတ် စီးပွားရေးလောကမှာ လုပ်ငန်းရှင်တွေဟာ အောင်မြင်ဖို့အတွက် လိုအပ်တဲ့လုပ်ငန်းဆိုင်ရာ ကျွမ်းကျင်မှုတွေအားလုံးကို နားလည်တတ်ကျွမ်းနေဖို့ မလွယ်ပါဘူး။ ဒါကြောင့် အရည်အချင်းပြည့်ဝတဲ့ ဝန်ထမ်းအဖွဲ့ကို သင့်လုပ်ငန်းစတင်စဉ်ကတည်းက နည်းပညာပိုင်းအထောက်အပံ့ပေးမယ့် ဝန်ထမ်းတွေနဲ့ Marketing ကျွမ်းကျင်တဲ့ ဝန်ထမ်းအဖွဲ့တွေကို ခန့်ထားပါ။ ဝန်ထမ်းတွေကို လေ့ကျင့်ပျိုးထောင်ပေးရတာဟာ အချိန်တွေ၊ ငွေတွေ ကုန်ကျပေမဲ့ အောင်မြင်တဲ့လုပ်ငန်းတစ်ခုကို ဖန်တီးဖို့ဖြစ်တဲ့အတွက် အများကြီးအကျိုးရှိပါတယ်။

ခိုင်မြဲတဲ့ဆက်ဆံရေးရှိတာက ပုဂ္ဂိုလ်ရေးအရရော လုပ်ငန်းသဘောအရပါ အောင်မြင်ဖို့အတွက် အလွန်အရေးပါတဲ့အချက်ဖြစ်ပါတယ်။ ဒါကြောင့် တကယ်လို့ သင့်ဝန်ထမ်းတွေ စိတ်ဖိစီးမှုတွေ၊ပြဿနာတွေနဲ့ ရင်ဆိုင်နေရတယ်ဆိုရင် သင်တို့ရဲ့ ဆက်ဆံရေးကို ပြန်လည်ဆန်းစစ်ကြည့်ဖို့ အချိန်ကျနေပြီဖြစ်တယ်။ ”အလုပ်ခန့်ရာမှာ အချိန်ယူစဉ်းစားပြီး အလုပ်ဖြုတ်ရာမှာ မတွေေဝေနဲ့” ဆိုတဲ့ ဆိုရိုးကိုသတိရထားပါ။ အကျိုးအမြတ်နည်းနည်းပဲရပြီး ပြဿနာများများဖြစ်စေတဲ့ သင့်ရဲ့ လုပ်ဖော်ကိုင်ဖက်ကုမ္ပဏီတွေနဲ့လည်း ဒီဆိုရိုးအတိုင်းပဲ ပြုမူပါ။ ဘယ်ဆက်ဆံရေးမှာပဲဖြစ်ဖြစ် အကျိုးရှိတာနဲ့မရှိတာက ဒွန်တွဲနေတာကြောင့် ပေါင်းသင်းဆက်ဆံရေးမှာ အမြဲသတိရှိပါ။

၅။ အောင်မြင်စွာနဲ့ ပြီးစီးနိုင်မယ့်အချိန်ကို ကြိုတင်မှန်းဆပါ။

လုပ်ငန်းတွေဟာ မှန်းထားတာထက်ပိုပြီး အချိန်ပိုကြာတတ်တာကြောင့် သင့်ရဲ့လုပ်ငန်းတွေ ပြီးစီးမယ်လို့ ခန့်မှန်းထားတဲ့ အချိန်ထက် ၂၀ ရာခိုင်နှုန်း ပိုတွက်ထားပါ။ လုပ်ငန်းရှင်တွေဟာ သူ့ဝန်ထမ်းတွေကို နားလည် ထားသင့်ပါတယ်။ အနည်းဆုံးတော့ လုပ်ငန်းကို မစတင်မီမှာ ဘယ်သူတွေက ဘယ်သူ့ရဲ့လက်အောက်မှာရှိတယ်ဆိုတာလောက်ကိုတော့ သိထားသင့်ပါတယ်။ ဒါကလုပ်ငန်းတာဝန်တွေ ခွဲဝေပေးတဲ့အခါ ဘယ်သူ့ကို ဘယ်တာဝန်ပေးရမယ်ဆိုတာကို သိသာစေပြီး အလုပ်လုပ်ရတဲ့အခါမှာလည်း အစီအစဉ်တကျနဲ့ လွယ်ကူစေမှာဖြစ်ပါတယ်။

၆။ အလုပ်ကိုစနစ်တကျနဲ့ ဂရုတစိုက်လုပ်ပါ။

ပြီးပြီးသားတွေကို ထပ်ခါတလဲလဲ မလုပ်ရပါစေနဲ့။ လုပ်ငန်းတိုင်းရဲ့ကဏ္ဍအတော်များများမှာ ဒီလုပ်ငန်းကို နောက်တစ်ခေါက်ပြန်လုပ်တဲ့အခါမှာ လွယ်ကူအောင် ဘာတွေကိုလုပ်ခဲ့ပြီးပြီလဲဆိုတာကို စနစ်တကျ စာရင်းပြု စုထားသင့်တယ်။ ဒီလိုလုပ်ထားခြင်းက တခြားသူတွေကို တာဝန်တွေလွဲပြောင်းပေးတဲ့အခါမှာ အချိန်ကုန် ငွေကုန်သက်သာစေပြီး အလုပ်လည်း ပိုတွင်ကျယ်စေတယ်။ ပြီးပြီးသားလုပ်ငန်းတွေကို အသေးစိတ်ပြန်လည်စစ်ဆေးပါ။ ဒါအပြင် စနစ်တကျ စာရင်းပြုစုထားပြီး ပိုကောင်းအောင် လုပ်နိုင်မယ့်နည်းလမ်းတွေကိုရှာဖွေပါ။ ဒါက သင့်ရဲ့ လုပ်ငန်းအောင်မြင်ဖို့အတွက် အချိန်ကုန် ငွေကုန်သက်သာစေတဲ့နည်းဖြစ်တဲ့အပြင် သင့်ရဲ့လုပ်ငန်းကို ရေရှည်မှာ အောင်မြင်စေဖို့အတွက်ကိုလည်း အထောက်အကူပေးမှာဖြစ်ပါတယ်။ နောက်ပြီး သင့်ရဲ့လုပ်ငန်းကို ရှောရှောရှူရှူနဲ့ အောင်မြင်စွာအဆုံးသတ်နိုင်မယ့် နည်းလည်းဖြစ်တယ်။

၇။ တာဝန်တွေကို ခွဲဝေပေးပါ။

လုပ်ငန်းတာဝန်တွေကို စနစ်တကျခွဲဝေပေးတာက သင့်လုပ်ငန်းအောင်မြင်မှုကို ရရှိစေမယ့်နည်းလမ်းတစ်ခု ဖြစ်တယ်။ ဒါအပြင် လုပ်ငန်းတွေကို အောင်မြင်စေဖို့အတွက် နံပါတ်သုံးအချက်မှာ ပြထားတဲ့အတိုင်း အရေးကြီးတာတွေကို အရင်လုပ်ပါ။ ဥပမာအနေနဲ့ Blog မှာ Post ရေး ပြီးမှ အသံဖိုင်တွေ၊ ဗီဒီယိုဖိုင်တွေ တင်သလိုမျိုး အလုပ်တွေကို တစ်ခုစီခွဲလုပ်ပါ။ အလုပ်တွေ အများကြီးကို နည်းနည်းစီခွဲပြီးလုပ်တာက အလုပ်ပြီးစီးဖို့အတွက် လွယ်ကူစေတဲ့အပြင် စိတ်ဖိစီးမှုတွေကိုလည်း လျော့ချပစ်နိုင်တဲ့နည်းလမ်းကောင်း တစ်ခုဖြစ်ပါတယ်။

၈။ အမှားတွေကနေ သင်ခန်းစာယူပါ။

သင်ယူနေတာဟာ တိုးတက်နေတာပါပဲ။ ဒါကြောင့် အမှားတွေကနေ သင်ခန်းစာယူပါ။ ဒါက သင့်ရဲ့လုပ်ငန်းကို ရေရှည်မှာ အောင်မြင်တဲ့ လုပ်ငန်းအဖြစ် တိုးချဲ့နိုင်စေမှာဖြစ်တဲ့အပြင် သင့်ကိုလည်း ပိုမိုကောင်းမွန်တဲ့ ဘဝကို ပိုင်ဆိုင်စေမှာဖြစ်ပါတယ်။ တကယ်လို့ အမှားကရုတ်တရတ်ပေါ်ပေါက်လာတာဆိုရင် ဘာကြောင့်မှားသလဲဆိုတာကို ဆန်းစစ်ပါ။ ဒီလိုလုပ်ခြင်းက နောက်ပိုင်းမှာဖြစ်လာနိုင်တဲ့ ပြဿနာတွေနဲ့ကိစ္စရပ်တွေကို ကြိုတင်မျော်လင့်ထားပြီးသားဖြစ်တာကြောင့် နောက်တစ်ခါထပ်မှားရင် အလွယ်တကူနဲ့ ဖြေရှင်းနိုင်စေပါလိမ့်မယ်။ နောက်ပြီး မမျော်လင့်ထားတဲ့အခက်အခဲတွေနဲ့ ရင်ဆိုင်ဖို့အတွက်လည်း အကောင်းဆုံးကြိုတင်ပြင် ဆင်ပြီးသားဖြစ်စေပါတယ်။