ငွေကြေးပညာရှင်မဟုတ်သူ မန်နေဂျာများအတွက် ငွေကြေးပညာ

ယခင်လမှအဆက်

၁၈။ ကြိုတင်ပြင်ဆင်ပါ၊ ကြိုတင်ပြင်ဆင်ပါ၊ ကြိုတင်ပြင်ဆင်ပါ။ (Prepare, Prepare, Prepare)

ဘတ်ဂျက် (Budget) သို့မဟုတ် ရ-သုံးမှန်းခြေငွေစာရင်းကိန်းဂဏန်းများ ဖြစ်လာစေရန်အတွက် မှော်အတတ်ဖြင့်လွယ်ကူစွာဖန်တီးနိုင်သော နည်းလမ်းမရှိပါ။ သို့သော်လည်း ယင်းဖြစ်စဉ်ကို ချောမွေ့စွာဖြစ်စေရန်အတွက်နည်းလမ်းအဆင့်ဆင့်ရှိသည်။ အဓိကအချက်မှာ သက်ဆိုင်ရာအကြောင်းအရာကို သိကျွမ်းသူများအားစာရင်းပြုစုရန်ဖြစ်သည်။အချို့သောဖြစ်ရပ်များတွင် မိမိ၏လုပ်ငန်းနယ်ပယ်နှင့် ကုမ္ပဏီများအကြောင်းကိုသိသည့် ငွေစာရင်းကိုင်၊ ငွေစာရင်းပညာရှင်တစ်ဦးဦးနှင့်တွေ့ဆုံဆွေးနွေးခြင်းသည် အစကောင်းတစ်ခုဖြစ်သည်။ မတွေ့ဆုံမီမေးခွန်းများ စာရင်းကို ပြင်ဆင်ထားနိုင်သည်။ အဓိကကျသောမေးခွန်းများ ကျန်မသွားစေရန်သတိထားရမည်။ မေးခွန်း၏အဖြေသည် ဘာသာရပ်အလွန်ဆန်ပါက (Too Technical) ရှင်းပြပေးဖို့မေတ္တာရပ်ခံရမည်။ဤအဆင့်တွင် မိမိရထားသောအကြောင်းအရာများအား အခြားဌာနများမှ မန်နေဂျာများအား မျှဝေချင်လိမ့်မည်။

ယခုအချိန်တွင် မိမိ၏ဌာနမှလူအင်အား၊ ကိရိယာအင်အား (Resources) လိုအပ်မည့် နောက်ထပ်ပရောဂျက်များ ရှိ-မရှိ ရှာဖွေရမည့်အချိန်ဖြစ်သည်။ သာဓကအားဖြင့် “စက်တွေအားလုံးကောင်းရဲ့လား” ဟုမမေးချင်ပါက”စက်တွေနဲ့ပတ်သက်ပြီး ဘယ်လို အခက်အခဲ၊ ပြဿနာတွေရှိနေလဲ” ဟူသောဖွင့်မေးသည့် မေးခွန်းကိုမေးရမည်။ အဖြေရပါကကုန်ကျစရိတ်ကြီးသော စက်များကိုပြင်ရန်၊ သို့မဟုတ် အစားထိုးရန် သုတေသနလုပ်ရန်၊ ဘတ်ဂျက်ရှာဖို့လိုလာမည်။ထိုကဲ့သို့ အဆင့်ဆင့်လုပ်ဆောင်လာနေစဉ်တွင် မတိုင်မီတစ်နှစ်ကဘတ်ဂျက်ကို ပြန်ကြည့်ရန်လိုလာမည် ဖြစ်သည်။ သို့သော်ထိုကိန်းဂဏန်းများကို မှတ်ယူရန်မဟုတ်ပါ။ ယင်းဘတ်ဂျက်ကိန်းဂဏန်းများအား လမ်းညွှန်အဖြစ် အသုံးပြုရန်သာဖြစ်သည်။ ယင်းဘတ်ဂျက်အဟောင်းမှာ အသုံးဝင်နိုင်သော်လည်း သတင်းအကြောင်းများမှာ ဟောင်းနွမ်းနေလိမ့်မည်။

အထက်တွင်ဆိုခဲ့ပြီးသော အကြံပေးချက်များအပြင် ဘတ်ဂျက်ရေးဆွဲခြင်းဖြစ်စဉ်အား အထောက်အကူ ဖြစ်စေမည့်အချက်များကို အောက်တွင်ဖော်ပြထားပါသည်။-

လုံလောက်သောအချိန်ပေးပါ (Allow enough time)။

သင်လိုအပ်သောသတင်းအချက်အလက်များ အားလုံးကိုစုဆောင်းရန် နှစ်လမှသုံးလအထိ ကြာမြင့်နိုင်သည်။

– ဝင်ငွေဖြင့်စပါ (Start with revenue)။

အရောင်းရည် မှန်းချက်များထားပါ။ ထို့နောက်ထိုရည်မှန်းချက်များပြည့်မီရန် အရင်းအမြစ်များ (လူ၊ ပစ္စည်းစသည်ဖြင့်)ကို ဆုံးဖြတ်ပါ။

– တွေးဆဖော်ပြခြင်းများကိုရှောင်ပါ (Avoid guesstimates)။

ကိန်းဂဏန်းများကို တတ်နိုင်သမျှခိုင်မာကြောင်းပြောပါ။

The Bottom Line (အခြေခံကျသောအချက်)

ယခင်နှစ်များ၏ ဘတ်ဂျက်များကိုတာထွက်အနေဖြင့် အသုံးပြုပါ။ ယင်းတို့သည် ဖြေရှင်းချက်များမဟုတ်ပါ။

၁၉။ လက်တွေ့ကျသော အရောင်းရည်မှန်းချက်များထားပါ (Set Realistic Sales Goals)

နှစ်စဉ်ဘတ်ဂျက်ရေးဆွဲသည့်အခါ အရောင်းကြိုတင်ခန့်မှန်းခြင်းသည် ဟန်ချက်ညီမှုကို ဖန်တီးခြင်းဖြစ်သည်။ဝန်ထမ်းများကို အကောင်းဆုံးကြိုးစားအားထုတ်ရန် တွန်းအားပေးသည့် အရောင်းရည်မှန်းချက်ထားရှိချင်သကဲ့သို့ ရည်မှန်းချက်မှာပေါက်မြောက်နိုင်မှုရှိဖို့လည်းလိုအပ်သည်။ရယူနိုင်သောရည်မှန်းချက်ထားခြင်းသည် အထူးအရေးကြီးသည်။ အကြောင်းမှာငွေကြေးစီးဆင်းမှုအတွက်ဆုံးဖြတ်ချက်များချခြင်းသည် ခန့်မှန်းထားသော အရောင်းများအပေါ်တွင် အခြေခံ၍ဖြစ်သည်။ အရောင်းများမြင့်တက်လာမည်ဟု မျှော်လင့်ရပါက စီမံခန့်ခွဲသူများက စက်ကိရိယာအသစ်များ၊ ဝန်ထမ်းအသစ်များ ပြည့်မမီပါကငွေသားစီးဆင်းမှုတွင် ပြဿနာများကြုံတွေ့နိုင်သည်။

မိမိ၏အရောင်းခန့်မှန်းချက်များကို ကုမ္ပဏီ၏ရည်မှန်းချက်များနှင့် ကိုက်ညှိပြီးနောက် အတိတ်ကာလ(ပြီးခဲ့သောနှစ်များ) အရောင်းများကိုကြည့်နိုင်သည်။ယင်းအရောင်းများကို ကြည့်ခြင်းအားဖြင့် ယှဉ်ပြိုင်ဘက်များ၏ လှုပ်ရှားမှုများ၊ ကြော်ငြာများ၏အရောင်းအပေါ် သက်ရောက်မှုတို့ကို လေ့လာကြည့်နိုင်သည်။ဥပမာအားဖြင့် ဈေးနှုန်းကိုချခြင်းအားဖြင့် အရောင်းမြင့်တက်လာနိုင်ကြောင်း အတိတ်အရောင်းများကပြောလိမ့်မည်။ နိမ့်ကျသောဈေးနှုန်းများကြောင့် အမြတ်အစွန်းများကျဆင်းသွားပြီဟူသော အခြေအနေမရောက်မချင်းဈေးနှုန်းလျှော့ချခြင်းအကြံဉာဏ်မှာ ဆွဲဆောင်မှုရှိသည်။ အကောင်းဆုံးဈေးနှုန်းသတ်မှတ်သည့် မဟာဗျူဟာမှာအရောင်းမြှင့်တင်ရုံသက်သက်မဟုတ်ဘဲ အမြတ်အစွန်းများကို အများဆုံးဖြစ်အောင်လုပ်ခြင်းဖြစ်သည်။

အတိတ်အရောင်းများကို လေ့လာသုံးသပ်ခြင်း၏တစ်စိတ်တစ်ပိုင်းမှာ နှစ်စဉ်လုပ်ငန်းအခြေအနေထပ်တလဲလဲဖြစ်ခြင်း၏ သက်ရောက်မှုဖြစ်သည်။ အတိတ်သမိုင်းကိုအခြေခံလျက်လက်ရှိ Customers များထံမှအနာဂတ်တွင် လုပ်ငန်းမည်မျှဖွံ့ဖြိုးမည်ဟု မျှော်လင့်သလဲ။ လာမည့်နှစ်အတွက် ရေရှည်စာချုပ်နှင့်ခိုင်မာသောအမှာစာမည်မျှရှိပြီးပြီလဲ။ လုပ်ငန်းအများအပြားတွင် အရေးကြီးသည့်စဉ်းစားမှုမှာ ရာသီအလိုက်အရောင်းများနှင့် အထူးပရိုမိုးရှင်းများပင်ဖြစ်သည်။ လုပ်ငန်းအများစုသည်တစ်နှစ်ပတ်လုံး ပုံမှန်အရောင်းများမရှိ။ ရာသီအလိုက်အရောင်းမြင့်တက်ခြင်း၊ နိမ့်ကျခြင်းတို့ကို ကြိုတင်ခန့်မှန်း၍ရသည်။ဘတ်ဂျက်တွင်အမျိုးမျိုးပြောင်းလဲနေသော အရောင်းခန့်မှန်းရန်အတွက် အချိန်အနည်းငယ်ပိုကြာလိမ့်မည်။ သို့သော်လည်းထိုနည်းလမ်းမှာ သာမန်စုစုပေါင်းတစ်နှစ်စာ ခန့်မှန်းအရောင်းကိုသာယူပြီး ၁၂ ဖြင့်စားခြင်းထက်ပိုကောင်းသည်။

ထိုသို့ပြုလုပ်ခြင်းက လက်တွေ့မကျသဖြင့် အမှန်တကယ်အရောင်းကိန်းဂဏန်းများနှင့်ဘတ်ဂျက်ကိန်းဂဏန်းများတိုက်ကြည့်ပါက ခက်ခဲမှုရှိလိမ့်မည်။အောက်ပါတို့ကိုပြုလုပ်ခြင်းဖြင့် အနာဂတ်အတွက် မျှော်မှန်းထားသောအရောင်းများကို သုံးသပ်ပါ။

– ယှဉ်ပြိုင်မှုကိုသုံးသပ်ပါ (Scope out the competition)။

ယှဉ်ပြိုင်ဘက်၏ပြောင်းလဲလာသော အရောင်းမဟာဗျူဟာများကို လေ့လာပါ။

– လုပ်ငန်းအကြောင်းရေးထားသည့် စာအုပ်များကိုဖတ်ပါ (Read industry publications)။

နောက်ဆုံးသတင်းများကိုရယူပါ။

– မကြာမီပြုလုပ်တော့မည့်အထူးပွဲများကိုရှိ-မရှိကြည့်ပါ (Check for upcoming special events)။

မိမိ၏အရောင်းများကို သက်ရောက်မှုရှိနိုင်သည့် အထူးပွဲကြီးများရှိနိုင်သလား။

The Bottom Line (အခြေခံကျသောအချက်)

တွန်းတွန်းတိုက်တိုက်လုပ်၍ရယူနိုင်သည့် အရောင်းရည်မှန်းချက်အတွက် ကြိုးပမ်းပါ။

ရဲညွန့် (မဟာဝိဇ္ဇာ၊ နိုင်-ဆက်)